Agentlik rahbariyati Qishloq xo‘jaligi departamenti (USDA) hamda AQSH elchixonasi vakillaridan iborat delegatsiya bilan uchrashuv o‘tkazdi.

2026-yil 30-yanvar kuni O‘zbekiston Respublikasi Vazirlar Mahkamasi huzuridagi Yengil sanoatni rivojlantirish agentligi direktori o‘rinbosari Ruxullo Zikrillayev AQSH Qishloq xo‘jaligi departamenti (USDA) hamda AQSH elchixonasi vakillaridan iborat delegatsiya bilan uchrashuv o‘tkazdi. Uchrashuv davomida O‘zbekiston to‘qimachilik sanoatida amalga oshirilayotgan islohotlar, 2025-yilda paxta-to‘qimachilik klasterlari tomonidan 4 million tonna paxta xomashyosi yetishtirilgani, tayyor mahsulot ishlab chiqarish hajmi 2017-yilga nisbatan 5,4 barobarga, eksport hajmi esa 4 barobarga oshgani qayd etildi. Shuningdek, uchrashuv doirasida USDA huzuridagi Tashqi qishloq xo‘jaligi xizmati (FAS) tomonidan amalga oshirilayotgan GSM-102 “Eksport kredit kafolati dasturi” imkoniyatlari muhokama qilindi. Mazkur dastur doirasida O‘zbekiston yengil sanoat klasterlariga yuqori sifatli “Pima” va “ELS” tolali paxtani yetkazib berish, kredit shartlarini soddalashtirish va muddatlarini uzaytirish bo‘yicha takliflar bildirildi. Tomonlar “Made with U.S. Cotton” yorlig‘i ostida ishlab chiqariladigan mahsulotlar orqali O‘zbekiston to‘qimachilik mahsulotlarining AQSH va Yevropa Ittifoqi bozorlaridagi nufuzini yanada oshirish, shuningdek tijorat banklari va klasterlar uchun maxsus o‘quv dasturlarini tashkil etish masalalarida ham kelishuvlarga erishdilar. Uchrashuv yakunida o‘zaro manfaatli hamkorlikni yanada kengaytirish va qo‘shma loyihalarni amalga oshirish bo‘yicha kelgusidagi hamkorlik yo‘nalishlari belgilab olindi.